କୋରାପୁଟ,ଜୟପୁର,ଏନ୍ଏନ୍ଏସ୍: ସେମିଲିଗୁଡ଼ା ପୁଲିସ ୯୨୧ କିଲୋଗ୍ରାମ ଗଞ୍ଜେଇ ସହ ଏକ ଟ୍ରକ୍ ଓ ପିକଅପ୍ ଭ୍ୟାନ୍ ଜବତ କରିଛି। ହେଲେ ଚୋରା ଗଞ୍ଜେଇ ବେପାରୀ ପୁଲିସ୍ ହାତରୁ ଖସି ପଳାଇଥିବା ଜଣାପଡ଼ିଛି। କୋକ୍ରିଗୁଡ଼ା ପାକଝୋଲା ରାସ୍ତାରେ ଏକ ଟ୍ରକରେ ଗଞ୍ଜେଇ ଲୋଡିଂ ହେଉଥିବା ସୂଚନା ପାଇ ପୁଲିସ୍ ଚଢ଼ଉ କରିଥିଲା। ସେଠାରୁ ଉକ୍ତ ସାମଗ୍ରୀ ଜବତ କରିବା ପରେ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ଜଣକୁ ଅଟକ ରଖି ପଚରାଉଚୁରା କରୁଥିବାବେଳେ ସମସ୍ତ ଅଭିଯୁକ୍ତ ଚିହ୍ନଟ ହୋଇଥିବା ସୂଚନା ମିଳିଛି।
ସେହିପରି ବୈପାରିଗୁଡ଼ା ପୁଲିସ ୨ଟି ଘର ଉପରେ ଚଢ଼ଉ କରି ବିପୁଳ ପରିମାଣରେ ବିଦଶେୀ ମଦ ଜବତ କରିଥିବା ଓଆଇସି ଅଂଶୁମାନ ଦ୍ୱିବେଦୀ ସୂଚନା ଦେଇଛନ୍ତି। ଦୁର୍ଗାମଣ୍ଡପ ସାହିର ଟି.ପ୍ରଶାନ୍ତ କୁମାର ଚୌଧୁରୀ ଓ ମହନ୍ତପୁଟର ବୁଦ୍ରା ଦୁରୁଙ୍କ ଘରେ ବିଦେଶୀ ମଦ ଥିବା ସୂଚନା ପାଇ ଚଢ଼ଉ କରାଯାଇଥିଲା। ଉଭୟଙ୍କ ଘରୁ ୨୧ ଲିଟର ୫୬୦ ମିଲିଲିଟର ବିଦେଶୀ ମଦ ଜବତ କରାଯିବା ସହ ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି।
