ନୂଆଦିଲ୍ଲୀ,ଏଜେନ୍ସି: ଭାରତୀୟ ଡାକ ବିଭାଗ ନିଜ ସେବାରେ ବ୍ୟାପକ ପରିବର୍ତ୍ତନ ଆଣିଛି । ଜାତୀୟ ପେନସନ ଯୋଜନା, ନାଗରିକ ମଡେଲ ଯୋଜନାକୁ ନିଜ ସେବାରେ ସାମିଲ କରିଛି ଡାକ ବିଭାଗ । ଭାରତ ସରକାରଙ୍କ ଏହି ସ୍ବେଚ୍ଛାକୃତ ପେନସନ ଯୋଜନା ୨୦୧୦ ପରଠାରୁ ଭୌତିକ ପ୍ରକ୍ରିୟା ପ୍ରଣାଳୀ ମାଧ୍ୟମରେ ପେନସନ ନିଧି ନିୟାମକ ଓ ବିକାଶ ପ୍ରାଧିକରଣ (ପିଏଫଆରଡିଏ) ଦ୍ବାରା ଡାକଘର ଗୁଡିକ ମାଧ୍ୟମରେ ପରିଚାଳନା ହେଉଥିଲା।
ଡାକ ବିଭାଗ ଏବେ ଏନପିଏସ (ସମସ୍ତ ନାଗରିକ ମଡେଲ) ଅନଲାଇନ ସେବା ପ୍ରଦାନ କରୁଛି। ଯାହା ଗତକାଲି ଠାରୁ ଆରମ୍ଭ ହୋଇଛି । ୧୮-୭୦ ବର୍ଷ ବୟସ ବର୍ଗର ଯେକୌଣସି ଭାରତୀୟ ନାଗରିକ ଡାକ ବିଭାଗ (www.indiapost.gov.in)ର ଅଫିସିଆଲ ୱେବସାଇଟକୁ ଯାଇ ମେନୁ ହେଡ ‘ଜାତୀୟ ପେନସନ ପ୍ରଣାଳୀ- ଅନଲାଇନ ସେବା ’ ମାଧ୍ୟମରେ ଏହି ଅନଲାଇନ ସୁବିଧାର ଲାଭ ନେଇ ପାରିବେ ।
ଏନପିଏସ ଅନଲାଇନ ଅନ୍ତର୍ଗତ ନୂଆ ପଞ୍ଜିକରଣ, ପ୍ରାରମ୍ଭିକ/ପରବର୍ତ୍ତୀ ଯୋଗଦାନ ଓ ଏସଆଇପି ବିକଳ୍ପ ଭଳି ସୁବିଧାଗୁଡିକ ସର୍ବନିମ୍ନ ଶୁଳ୍କରେ ଗ୍ରାହକମାନଙ୍କ ପାଇଁ ଉପଲବ୍ଧ ରହିଛି । ବିଭାଗର ଏନପିଏସ ସେବା ଶୁଳ୍ପ ସବୁଠାରୁ କମ ରହିଛି । ଅର୍ଥମନ୍ତ୍ରାଳୟ ବିଭିନ୍ନ ସମୟରେ କରୁଥିବା ଘୋଷଣା ଅନୁଯାୟୀ ଗ୍ରାହକ ୮୦ ସିସିଡି ଅନ୍ତର୍ଗତ ଏନପିଏସରେ ଟିକସ ଛାଡ ପାଇବା ପାଇଁ ଯୋଗ୍ୟ ବିବେଚିତ ହେବ ।
