ଅବକାରୀ ଟିମ୍କୁ ସଂଘବଦ୍ଧ ଆକ୍ରମଣ, ଗୋଟିଏ ପରିବାରର ୪ ଗିରଫ
ଭୁବନେଶ୍ୱର,ଏନ୍ଏନ୍ଏସ୍: ରାଜଧାନୀରେ ନିଶାବେପାରୀଙ୍କ ଉତ୍ପାତ ବଢ଼ିବାରେ ଲାଗିଛି। ଚୋରାରେ ନିଶାବେପାର କରିବା ସହ ଏମାନେ ଗୁଣ୍ଡାରାଜ୍ ଆରମ୍ଭ କରିଦେଇଛନ୍ତି। ଯଦି ସେମାନଙ୍କ ବିରୋଧରେ କିଏ ସ୍ୱର ଉଠାଉଛି, ତା’ହେଲେ ମାରିବାକୁ ବି ପଛାଉନାହାନ୍ତି। ଏମିତିକି ଚଢ଼ାଉ ସମୟରେ ଅବକାରୀ ଟିମ୍କୁ ମଧ୍ୟ ଛାଡ଼ିନାହାନ୍ତି। ଗୁରୁବାର ଭୁବନେଶ୍ୱର ଅବକାରୀ ଟିମ୍
ଭରତପୁର ହରପାର୍ବତୀ ସାହିରେ ଚଢ଼ାଉ କରିବାବେଳେ ସେମାନଙ୍କ ଉପରକୁ ଆକ୍ରମଣ ହୋଇଛି।
ନିଶାବେପାରୀମାନେ ଅବକାରୀ ଟିମ୍କୁ ସଙ୍ଘବଦ୍ଧ ଭାବେ ଗୋଡ଼ାଇ ଗୋଡ଼ାଇ ଆକ୍ରମଣ କରିଛନ୍ତି। କିଏ କାଠଫାଳିଆ ତ ପୁଣି କିଏ ଲୁହାରଡ୍ରେ ଅବକାରୀ ଟିମ୍କୁ ନିସ୍ତୁକ ପିଟିଛନ୍ତି। ଯାହାଫଳରେ ଅବକାରୀ ଟିମ୍ରେ ଥିବା ୧୭ ଜଣ କର୍ମଚାରୀ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ ୪ଜଣ ଗୁରୁତର ଭାବେ ଆହତ ହୋଇଛନ୍ତି। ଏଥିସହିତ ଜଣେ ମହିଳା ଅଧିକାରୀ ଆହତ ହେବା ସହ ଦୁର୍ବ୍ୟବହାରର ଶିକାର ମଧ୍ୟ ହୋଇଛନ୍ତି। ଘଟଣାସ୍ଥଳରେ ଭରତପୁର ଥାନା ପୁଲିସ ପହଞ୍ଚିବାରୁ ପରିସ୍ଥିତି ନିୟନ୍ତ୍ରଣ ହୋଇଥିଲା।
ଏହି ଘଟଣାରେ ଭରତପୁର ଥାନା ପୁଲିସ କେସ୍ ନଂ ୧୭୧/୨୧ରେ ଏକ ମାମଲା ରୁଜୁ କରି ଦୁଇଜଣ ମହିଳାଙ୍କ ସମେତ ଗୋଟିଏ ପରିବାରର ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ନୟାଗଡ଼ ଜିଲା ଓଡ଼ଗାଁର ଅରୁଣ ନାୟକ ଓରଫ ଅରୁ(୨୯), ଧୁସା ନାୟକ(୧୯), ସୁନିତା ନାୟକ(୨୦), ଅଲ୍ଲୀ ନାୟକ ଓରଫ କୁମାରୀ(୨୯)। ଏମାନଙ୍କ ଠାରୁ ୪୦ ଲିଟର ମଦ ଜବତ ହୋଇଥିବା ଜଣାପଡ଼ିଛି। ତେବେ ଅଭିଯୁକ୍ତମାନେ ଭରତପୁର ଥାନା ହରପାର୍ବତୀ ସାହିରେ ରହୁଥିବାବେଳେ ସେଠାରେ ଚୋରାରେ ମଦ ଓ ଗଞ୍ଜେଇ ବ୍ୟବସାୟ କରୁଥିଲେ।
