ଭୁବନେଶ୍ୱର,ଏନ୍ଏନ୍ଏସ୍: ପ୍ରଥମେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପରେ ବିରୋଧୀଦଳ ନେତା ଜୟନାରାୟଣ ମିଶ୍ର ଏବଂ ତା’ପରେ କଂଗ୍ରେସ ବିଧାୟକ ମହମ୍ମଦ ମୋକିମ୍ । ଜଣେ ପରେ ଜଣେ ବିରୋଧୀ ନେତା ବିଜେଡିର କଟକ ସାଂସଦ ଭର୍ତ୍ତୃହରି ମହତାବଙ୍କୁ ପ୍ରଶଂସାରେ ପୋତିପକାଇଛନ୍ତି । ସମସ୍ତଙ୍କର ଭାଷା ପ୍ରାୟ ସମାନ ଥିଲା । ସମସ୍ତେ ତାଙ୍କୁ ଜଣେ ଦକ୍ଷ ଓ ଜ୍ଞାନୀ ଗୁଣୀ ନେତା ବୋଲି କହିଥିଲେ । ଏହାକୁ ନେଇ ବିଧାନସଭା ବାହାରେ ରୋଚକ ସ୍ଥିତି ଉପୁଜିଥିଲା ।
ବୁଧବାର କଂଗ୍ରେସ ବିଧାୟକ ମହମ୍ମଦ ମୋକିମ୍ ଭର୍ତ୍ତୃହରିଙ୍କ ସମ୍ପର୍କରେ କହିଥିଲେ, ସେ ବିଜେଡିର ସାଂସଦ । ମୁଁ କଟକର ବିଧାୟକ ଭାବରେ ଯେତିକି ଜାଣିଛି, ଭର୍ତ୍ତୃହରି ବାବୁ ଜଣେ ଜ୍ଞାନୀ ଲୋକ । ସେ ୬ ବର୍ଷ ଧରି କଟକକୁ ପ୍ରତିନିଧିତ୍ୱ କରିଆସୁଛନ୍ତି । ଏହାସହ ଉଚ୍ଚ ପଦ ପଦବୀରେ ରହି ଦିଲ୍ଲୀରେ କାମ କରୁଛନ୍ତି । ଆମର ଏକ ଅଭ୍ୟାସ କିଏ ଯଦି ଉପରକୁ ଉଠିବାକୁ ଚେଷ୍ଟା କରେ, କିଛି ତାକୁ ତଳକୁ ଟାଣିବାକୁ ଚେଷ୍ଟା କରନ୍ତି । ଯାହା କି ରାଜନୀତି ଓ ସମାଜିକ କ୍ଷେତ୍ରରେ ଶୋଭାପାଉନାହିଁ । ଧର୍ମେନ୍ଦ୍ରଙ୍କ ପ୍ରଶଂସା ସମ୍ପର୍କରେ ମୋକିମ୍ କହିଛନ୍ତି, କେନ୍ଦ୍ରମନ୍ତ୍ରୀ ଜଣେ ଜ୍ଞାନୀ ଲୋକ । ସେ ଭର୍ତ୍ତୃହରିଙ୍କୁ ପ୍ରଶଂସା କରିବାରେ ଅସୁବିଧା ନାହିଁ । ଯେଉଁମାନେ ଏହାକୁ ସହିପାରୁ ନାହାନ୍ତି ସେମାନେ ବିରୋଧ କରିବେ । ସେ ଦଳ ପାଇଁ କେବେ ଅଡ଼ୁଆ ନଥିଲେ କି ରହିବେ ନାହିଁ । କାରଣ ସେ ୬ଥର ସାଂସଦ ରହିଛନ୍ତି ବୋଲି ମୋକିମ୍ ମତ ରଖିଛନ୍ତି । ତେବେ ଆପଣ ବିଜେପି ଆଡ଼େ ମୁହାଁଇଛନ୍ତି କି ବୋଲି ପ୍ରଶ୍ନରେ ମୋକିମ କହିଥିଲେ, ଏବେ ବି ମୁଁ କଂଗ୍ରେସରେ ଅଛି, ରହିବି । ଗତ ଦୁଇବର୍ଷ ଧରି ମୋତେ ନେଇ ଚର୍ଚ୍ଚା ଚାଲିଛି । ତେଣୁ ସେଥିରେ ବ୍ୟସ୍ତ ହେଲେ ହେବନି ।
ସେହିଭଳି ଭର୍ତ୍ତୃହରିଙ୍କୁ ବିରୋଧୀଦଳ ନେତା ଜୟନାରାୟଣ ମିଶ୍ର ପ୍ରଶଂସା କରିଥିଲେ । ସେ କହିଥିଲେ, ଭର୍ତ୍ତୃହରି ଜଣେ ଦକ୍ଷ ନେତା । ଲୋକସଭାରେ ତାଙ୍କ ପରଫରମାନ୍ସ ବହୁତ ଭଲ । ତାଙ୍କୁ ସଂସଦରେ ଉପବାଚସ୍ପତି କରିବାକୁ ପ୍ରଧାନମନ୍ତ୍ରୀ ମୋଦୀ ଚାହୁଁଥିଲେ । ହେଲେ ତାଙ୍କ ଦଳରୁ ବିରୋଧ ଯୋଗୁଁ ତାହା ସମ୍ଭବ ହେଲା ନାହିଁ । ତେଣୁ ସେ ଗୁରୁତ୍ୱପୂର୍ଣ୍ଣ ପଦ ପାଇଲେ ନାହିଁ । ତେବେ ଭର୍ତ୍ତୃହରିଙ୍କ ପ୍ରସଙ୍ଗରେ ଜବାବ ରଖିଛନ୍ତି ବିଜେଡି ବିଧାୟକ ଭାଗିରଥୀ ସେଠୀ । ସେ କହିଛନ୍ତି, ମୁଖ୍ୟମନ୍ତ୍ରୀଙ୍କ ସହ ଭର୍ତ୍ତୃହରିଙ୍କ ସୁସଂପର୍କ ରହିଛି । ତେବେ ଭର୍ତ୍ତୃହରି ଏନେଇ କିଛି ପ୍ରତିକ୍ରିୟା ପ୍ରକାଶ କରିନାହାନ୍ତି ।
ମଙ୍ଗଳବାର ଦିଲ୍ଲୀରେ ଏକ ପୁସ୍ତକ ଉନ୍ମୋଚନ କାର୍ଯ୍ୟକ୍ରମରେ ଭର୍ତ୍ତୃହରିଙ୍କୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମୁକ୍ତ ପ୍ରଶଂସା ଓ ବୁଧବାର ତାଙ୍କ ପ୍ରତି ବିରୋଧୀଦଳ ନେତାଙ୍କ ସମାନ ଆଭିମୁଖ୍ୟକୁ ନେଇ ରାଜ୍ୟ ରାଜନୀତିରେ ଜୋରଦାର ଚର୍ଚ୍ଚା ଆରମ୍ଭହୋଇଛି । ଧର୍ମେନ୍ଦ୍ର ତାଙ୍କ ବକ୍ତବ୍ୟରେ ଭର୍ତ୍ତୃହରିଙ୍କୁ ଭୀଷ୍ମ ପିତାମହ, ତାଙ୍କୁ ପ୍ରଧାନମନ୍ତ୍ରୀ ଆଦର କରନ୍ତି ଆଦି କହିଥିଲେ । ତେବେ ନିଜ ଭାଷଣରେ ଭର୍ତ୍ତୃହରି ସିଧାସଳଖ କିଛି କହିନଥିଲେ ବି କେବଳ କହିଥିଲେ ଯେ ସେଦିନ ଗାନ୍ଧିଜୀ ଓଡ଼ିଶାରୁ ଭୟଦୂର କରିବାକୁ ଆହ୍ୱାନ ଦେଇଥିଲେ । କେନ୍ଦ୍ର ଶିକ୍ଷାମନ୍ତ୍ରୀ ମଧ୍ୟ ଭୟ ବିଷୟରେ ତାଙ୍କ ବକ୍ତବ୍ୟରେ କହିଛନ୍ତି । କାଳେ ମୋର ଅସୁବିଧା ହେବ ସେଥିପାଇଁ ସେ ଅନେକ କଥା କହିଲେ ନାହିଁ ।
