କେପଟାଉନ,ଏଜେନ୍ସି: ଦକ୍ଷିଣ ଆଫ୍ରିକାର କେପଟାଉନରେ ଚାଲିଥିବା ଆଇସିସି ମହିଳା ଟି ଟ୍ବେଣ୍ଟି ବିଶ୍ବକପରେ ଭାରତ ପ୍ରଥମ ପରାଜୟର ସାମ୍ନା କରିଛି । ଇଂଲଣ୍ଡ ବିପକ୍ଷ ତୃତୀୟ ମୁକାବିଲାରେ ଟିମ ଇଣ୍ଡିଆ ୧୧ ରନରେ ପରାସ୍ତ ହୋଇଛି । ସ୍ମୃତି ମାନ୍ଧାନାଙ୍କ ଅର୍ଦ୍ଧଶତକ ଓ ରିଚା ଘୋଷଙ୍କ ଲଢୁଆ ବ୍ୟାଟିଂ ବୃଥା ହୋଇଛି । ବିଜୟ ଲକ୍ଷ୍ୟ ନେଇ ଲଢେଇ କରିବା ପରେ ବି ଦଳ ପରାସ୍ତ ହୋଇଛି । ତୃତୀୟ ମ୍ୟାଚରେ ହ୍ୟାଟ୍ରିକ ବିଜୟ ସହ ୬ ପଏଣ୍ଟ ପାଇ ଇଂଲଣ୍ଡ ଗ୍ରୁପ ବିର ଶୀର୍ଷ ସ୍ଥାନରେ ରହିଛି । ଭାରତ ୨ଟି ବିଜୟ ଓ ଗୋଟିଏ ପରାଜୟ ସହ ୪ ପଏଣ୍ଟ ପାଇ ୨ୟ ସ୍ଥାନରେ ରହିଛି । ଆସନ୍ତାକାଲି (ସୋମବାର) ପରବର୍ତ୍ତୀ ମୁକାବିଲାରେ ଆୟର୍ଲାଣ୍ଡକୁ ଭେଟିବ ଭାରତ ।
ଟସ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲା ଭାରତ । ପେସ ବୋଲର ରେଣୁକା ସିଂହ ଆରମ୍ଭରୁ ଇଂଲଣ୍ଡ ବ୍ୟାଟରଙ୍କୁ ବାଟବଣା କରିଥିଲେ । ଇଂଲଣ୍ଡର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ । ରେଣୁକାଙ୍କ ଘାତକ ସୁଇଂରେ ଇଂଲଣ୍ଡର ଦଳୀୟ ସ୍କୋର ୨୪ରେ ୩ଟି ୱିକେଟ ପତନ ହୋଇଥିଲା । ଡାନି ୱାଟ ଖାତା ଖୋଲି ପାରି ନଥିଲେ । ସେହିପରି କ୍ୟାପସି ୩ ଓ ଶୋଫିଆ ଡଙ୍କଲି ୧୦ରନ କରି ସଅଳ ପାଭିଲିୟନ ଫେରିଥିଲେ । ମଧ୍ୟଭାଗରେ ନାତିଲି ସ୍କିଭର-ବ୍ରଣ୍ଡ, ହିଥର ଓ ଆମ ଜୋନ୍ସ ଲଢୁଆ ବ୍ୟାଟିଂ କରି ଦଳୀୟ ସ୍କୋରକୁ ଆଗକୁ ନେଇଥିଲେ । ୭ ୱିକେଟ ହରାଇ ଇଂଲଣ୍ଡ ୧୫୧ ରନ କରିଥିଲା । ଭାରତକୁ ୧୫୨ ରନ ବିଜୟ ଲକ୍ଷ୍ୟ ରହିଥିଲା । ଇଂଲଣ୍ଡର ନାତିଲି ସ୍କିଭର ସର୍ବାଧିକ ୫୦ ରନ କରିଥିଲେ । ରେଣୁକା ସିଂହ ୧୫ ରନ ଦେଇ ୫ଟି ୱେକଟ ନେଇଥିଲେ । ଶିକ୍ଷା ପାଣ୍ଡେ ଓ ଦୀପ୍ତୀ ଶର୍ମା ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ ।
୧୫୨ ରନ ବିଜୟ ଲକ୍ଷ୍ୟ ନେଇ ପାଳି ଆରମ୍ଭ କରିଥିଲା ଭାରତ। ଇଂଲଣ୍ଡର ଶୃଙ୍ଖଳିତ ବୋଲିଂ ଆଗରେ ଭାରତ ବ୍ୟାଟିଂ ରଣନୀତି କାମ କରି ନଥିଲା । ଓପନର ସ୍ମୃତି ମାନ୍ଧନା ଦର୍ଶନୀୟ ସଟ ଖେଳିଥିଲେ ହେଁ ଅନ୍ୟ ବ୍ୟାଟର କେହି କ୍ରିଜରେ ତିଷ୍ଠି ପାରି ନଥିଲେ । ଶେଫାଳି ବର୍ମା ୮, ଜେମିମା ରୋଡ୍ରିଗ୍ସ ୧୧ ଓ ଅଧିନାୟକ ହର୍ମନପ୍ରୀତ କୌର ୪ ରନ କରି ଆଉଟ ହେଇଥିଲେ । ମାନ୍ଧନା ଅର୍ଦ୍ଧଶତକ କରିଥିଲେ । ଦଳୀୟ ସ୍କୋର ୧୦୫ରେ ମାନ୍ଧନା ୪୧ ବଲରେ ୫୨ ରନ (୭ଚୌକା, ୧ ଛକା) କରି ଆଉଟ ହୋଇଥିଲେ । ରିଚା ଘୋଷ ଲଢୁଆ ବ୍ୟାଟିଂ ଜାରି ରଖିଥିଲେ । ରିଚା ୪୭ ରନ କରିଥିଲେ । ଦିପ୍ତୀ ଶର୍ମା ଓ ପୂଜା ବସ୍ତ୍ରାକାର ବିଫଳ ହେବା ପରେ ଭାରତ ରନ ଗାଡି ୧୪୦ରେ ଅଟକି ଯାଇଥିଲା । ଭାରତ ଲଢୁଆ ବ୍ୟାଟିଂ କରି ୫ ୱିକେଟ ହରାଇ ୧୪୦ ରନ କରିଥିଲା ।
