ଭୁବନେଶ୍ବର,ଏନ୍ଏନ୍ଏସ୍: ରାଜ୍ୟରେ ୧୯୭ ଜଣ ଗ୍ରୁପ ଏ’ର ଦନ୍ତ ଚିକିତ୍ସକ ନିଯୁକ୍ତି ହେବେ । ଏନେଇ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗର ସଚିବ ଓଡିଶା ଲୋକସେବା ଚୟନ ଆୟୋଗକୁ(ଓପିଏସସି) ଚିଠି ଲେଖିଛନ୍ତି । ଓଡିଶା ସ୍ବାସ୍ଥ୍ୟ ସେବା କ୍ୟାଡର ୨୦୨୨-୨୩ ବର୍ଷ ପାଇଁ ଓଡିଶା ମେଡିକାଲ୍ ସର୍ଭିସେସ୍ (ଡେଣ୍ଟାଲ୍) କ୍ୟାଡରର ଗ୍ରୁପ୍-ଏ (ଜୁନିଅର ଶାଖା) ପଦବୀରେ ନିୟମିତ ଡେଣ୍ଟାଲ୍ ସର୍ଜନ ନିଯୁକ୍ତି ହେବେ । ବର୍ତ୍ତମାନ ୧୯୭ଟି ଡେଣ୍ଟାଲ୍ ସର୍ଜନଙ୍କ ଖାଲି ପଦବୀକୁ ଓଡିଶା ମେଡିକାଲ୍ ସର୍ଭିସେସ୍ ଗ୍ରୁପ୍-ଏ (ଜୁନିଅର ଶାଖା) ପ୍ରବେଶ ସ୍ତରର ପଦବୀରେ ମୂଲ୍ୟାଙ୍କନ କରାଯାଇଛି ।
ଓଡ଼ିଶା ଜନସେବା ଆୟୋଗର ସୁପାରିଶ ଅନୁଯାୟୀ ଓଡ଼ିଶା ମେଡିକାଲ ସର୍ଭିସେସ୍ (ନିଯୁକ୍ତି ପ୍ରଣାଳୀ ଏବଂ ଦନ୍ତ ସର୍ଜନଙ୍କ ସେବା ସର୍ତ୍ତାବଳୀ) ନିୟମ ୨୦୨୨ ଜିଏ ଏବଂ ପିଜି ବିଭାଗ ବିଜ୍ଞପ୍ତି ଅନୁଯାୟୀ ଉପରୋକ୍ତ ଖାଲି ପଦଗୁଡିକ ନିୟମିତ ପୂରଣ କରାଯିବା ଆବଶ୍ୟକ ରହିଛି । ଖାଲି ପଦବୀ ପୂରଣ ପାଇଁ ଦିଆଯାଇଥିବା ତଥ୍ୟ ଅନୁଯାୟୀ, ଜେନେରାଲ ବର୍ଗରେ ଶତକଡା ଅନୁଯାୟୀ ଓଆର୍ଭି ୫୦ ରହିଥିବା ବେଳେ ସୃଷ୍ଟି ହୋଇଥିବା ମୋଟ ପୋଷ୍ଟ ମଧ୍ୟରୁ ୭୩ଟି ସିଟ ସାଧାରଣ ବର୍ଗଙ୍କ ପାଇଁ ରହିଛି । ସେହିପରି ୧୬ଜଣ ସାମାଜିକ ଓ ଶିକ୍ଷାଗତ ପଛୁଆ ବର୍ଗ, ୨୪ଜଣ ଅନୁସୂଚିତ ଜାତି ଓ ୮୪ଜଣ ଅନୁସୂଚିତ ଜନଜାତି ବର୍ଗରେ ନିଯୁକ୍ତି ପାଇବେ । ତେବେ ମୋଟ ୧୯୭ଟି ଡେଣ୍ଟାଲ୍ ସର୍ଜନଙ୍କ ଖାଲି ପଦବୀକୁ ଓଡିଶା ମେଡିକାଲ୍ ସର୍ଭିସେସ୍ ପ୍ରବେଶ ସ୍ତରର ପଦବୀରେ ମୂଲ୍ୟାଙ୍କନ କରାଯାଇଛି ।
