ଭୁବନେଶ୍ୱର,୧୫ା୩/ଏନ୍ଏନ୍ଏସ୍: ରାଜ୍ୟ ମତ୍ସ୍ୟ ଏବଂ ପ୍ରାଣୀ ସମ୍ପଦ ବିକାଶ ବିଭାଗରେ ୧୧୫ ସହକାରୀ ମତ୍ସ୍ୟ ଅଧିକାରୀ ଯୋଗ ଦେଇଛନ୍ତି । ଲୋକସେବା ଭବନରେ ନବନିଯୁକ୍ତ ଅଧିକାରୀଙ୍କ ନିମନ୍ତେ ଏକ ଦିଗଦର୍ଶନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଆଭାସି ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାର୍ଯ୍ୟକ୍ରମରେ ସାମିଲ ହୋଇ ଲୋକଙ୍କୁ ମତ୍ସ୍ୟଚାଷ ପ୍ରତି ଉତ୍ସାହିତ କରିବାକୁ ନବନିଯୁକ୍ତ ଅଧିକାରୀଙ୍କୁ କହିଥିଲେ । ଏହା ସେମାନଙ୍କ ଆୟରେ ଉନ୍ନତି ଆଣିବାରେ ସାହାଯ୍ୟ କରିବ ।
ମୁଖ୍ୟମନ୍ତ୍ରୀ କହିଥିଲେ, ମତ୍ସ୍ୟ ଉତ୍ପାଦନରେ ଓଡ଼ିଶା ବର୍ତ୍ତମାନ ଦେଶର ଚତୁର୍ଥ ସ୍ଥାନରେ ରହିଛି । ଓଡ଼ିଶାକୁ ମତ୍ସ୍ୟ ଉତ୍ପାଦନରେ ଏକ ନମ୍ବର କରିବା ପାଇଁ ମିଶନ ମୋଡରେ କାର୍ଯ୍ୟ କରିବାକୁ ସେ ଆହ୍ୱାନ କରିଥିଲେ । ୫-ଟି ଉପକ୍ରମର ଅନୁକରଣ କରି ନବନିଯୁକ୍ତ ଅଧିକାରୀମାନେ ଆନ୍ତରିକତାର ସହ କାର୍ଯ୍ୟ କରି ମତ୍ସ୍ୟ ଚାଷୀଙ୍କ ଜୀବନରେ ରୂପାନ୍ତର ଆଣିବେ ବୋଲି ମୁଖ୍ୟମନ୍ତ୍ରୀ ଆଶା ପ୍ରକାଶ କରିଥିଲେ । ରାଜ୍ୟରେ ମତ୍ସ୍ୟଚାଷ କ୍ଷେତ୍ରର ଅଗ୍ରଗତି ସମ୍ପର୍କରେ ଆଲୋକପାତ କରି ସେ କହିଥିଲେ, ଗତ ଦୁଇ ଦଶନ୍ଧିରେ ଓଡ଼ିଶାରେ ମତ୍ସ୍ୟ କ୍ଷେତ୍ରରେ ଉଲ୍ଲେଖନୀୟ ଅଭିବୃଦ୍ଧି ପରିଲକ୍ଷିତ ହୋଇଛି । ଗତ ଆର୍ôଥକ ବର୍ଷରେ ମତ୍ସ୍ୟ ଉତ୍ପାଦନ ପ୍ରାୟ ୧୦ ଲକ୍ଷ ମେଟ୍ରିକ୍ ଟନରେ ପହଞ୍ଚିଥିଲା । ଏହି ସମୟରେ ସାମୁଦ୍ରିକ ଖାଦ୍ୟ ରପ୍ତାନି ୧୨ଗୁଣ ବୃଦ୍ଧି ପାଇଛି । କୃଷି, ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ମତ୍ସ୍ୟଚାଷ କ୍ଷେତ୍ରରେ ସଫଳତା ସମ୍ପର୍କରେ ସୂଚନା ଦେଇଥିଲେ । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା କହିଥିଲେ ଯେ ମତ୍ସ୍ୟଚାଷ ଗ୍ରାମୀଣ ଅର୍ଥନୀତିରେ ବଡ଼ ଉନ୍ନତି ଆଣିପାରେ । ଦୁଇ ଅଧିକାରୀ ଅସ୍ମିତା ପାଣ୍ଡେ ଏବଂ ଉର୍ମିଳା ଗମାଙ୍ଗୋ ସ୍ୱଚ୍ଛ ଏବଂ ତ୍ୱରିତ ନିଯୁକ୍ତି ପ୍ରକ୍ରିୟା ନେଇ ସେମାନଙ୍କ ଅନୁଭୂତି ବାଣ୍ଟିଥିଲେ ।
ସେହିପରି ନବନିଯୁକ୍ତ ଅଧିକାରୀଙ୍କ ସହ ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭିକେ ପାଣ୍ଡିଆନ୍ ଆଲୋଚନା କରିବା ସହ ମୋ-ସରକାର ବିଷୟରେ ବୁଝାଇଥିଲେ । ଓଡ଼ିଶାର ଭିଜନ୍ ପୂରଣ କରିବା ପାଇଁ ଯୁବ ଅଧିକାରୀମାନେ କଠିନ ପରିଶ୍ରମ କରିବା ଉଚିତ୍ ବୋଲି ଶ୍ରୀ ପାଣ୍ଡିଆନ୍ ପରାମର୍ଶ ଦେଇଥିଲେ । ବିଭାଗୀୟ ସଚିବ ସୁରେଶ କୁମାର ବଶିଷ୍ଠ ସ୍ୱାଗତ ଭାଷଣ ଏବଂ ମତ୍ସ୍ୟ ନିର୍ଦେଶକ ସ୍ମୃତି ରଞ୍ଜନ ପ୍ରଧାନ ଧନ୍ୟବାଦ ଦେଇଥିଲେ । ସୂଚନାଯୋଗ୍ୟ, ୨୦୦୦-୦୧ରେ ସାମୁଦ୍ରିକ ଖାଦ୍ୟ ରପ୍ତାନି ୩୭୯ କୋଟି ଟଙ୍କା ଥିବାବେଳେ ୨୦୨୧-୨୨ରେ ଏହା ୪୫୨୬ କୋଟି ଟଙ୍କାରେ ପହଞ୍ଚିଛି ।
