ବାଲେଶ୍ୱର,ଏନ୍ଏନ୍ଏସ୍: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ହେଲିକପ୍ଟର ଯୋଗେ ବାହାନଗା ପହଞ୍ଚି ଘଟଣାର ସ୍ଥିତି ସମୀକ୍ଷା କରିଛନ୍ତି । ଏହି ସମୟରେ ମମତାଙ୍କ ସହ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉପସ୍ଥିତ ଥିଲେ । ପରେ ଗଣମାଧ୍ୟମକୁ ସମ୍ବୋଧନ କରି ମମତା କହିଛନ୍ତି ଯେ, ଏହା ଏକ ଅତ୍ୟନ୍ତ ଦୁଃଖଦ ଘଟଣା । ବର୍ତ୍ତମାନ ସମୟରେ କିପରି ଲୋକଙ୍କ ଜୀବନ ବଞ୍ଚାଇବା ସେଥିପ୍ରତି ଗୁରୁତ୍ୱ ଦିଆଯିବା ଉଚିତ । ଏହି ଟ୍ରେନରେ ଆଣ୍ଟି କୋଲିଜନ ଡିଭାଇସ ଥିଲେ ଏଭଳି ଘଟଣା ଘଟିନଥାନ୍ତା । ଆମ ରାଜ୍ୟର ଯେଉଁ ଲୋକ ପ୍ରାଣ ହରାଇଛନ୍ତି ତାଙ୍କ ପରିବାରକୁ ୫ ଲକ୍ଷ ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରାଯିବ । ମୃତକଙ୍କ ମଧ୍ୟରେ ପାଖାପାଖି ୬୦ ପ୍ରତିଶତ ଲୋକ ପଶ୍ଚିମବଙ୍ଗର ରହିଛନ୍ତି ।
ମୁଖ୍ୟମନ୍ତ୍ରୀ ବାନାର୍ଜୀ ଗଣମାଧ୍ୟମକୁ ସମ୍ବୋଧିତ କରୁଥିବାବେଳେ ପାଖରେ ଠିଆ ହୋଇଥିବା ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ସହ ମୃତକଙ୍କ ସଂଖ୍ୟାକୁ ନେଇ କଥା କଟାକଟି ହୋଇଥିଲା । ମମତା ମୃତକଙ୍କ ସଂଖ୍ୟା ୫୦୦ ବୋଲି କହିଥିଲେ । ସେଠାରେ ମମତାଙ୍କୁ ରୋକି ମୃତ୍ୟୁସଂଖ୍ୟା ୫୦୦ ନୁହେଁ ୨୩୮ ବୋଲି ବୈଷ୍ଣବ କହିିଥିଲେ । ମମତା କହିଥିଲେ ୨୩୮ ସମ୍ପର୍କରେ ମୁଁ କାଲିଠୁ ଶୁଣିଛି । ଏହି ସମୟରେ କାହିଁକି କବଚ ନାହିଁ ବୋଲି ମଧ୍ୟ ମମତା ପ୍ରଶ୍ନ କରିଥିଲେ ।
