ଭୁବନେଶ୍ୱର,ଏନ୍ଏନ୍ଏସ୍: ଆରଟିଓ କର୍ମଚାରୀ ଏବଂ କୋଭିଡ-୧୯ ମୁକାବିଲା ପାଇଁ କାର୍ଯ୍ୟ କରୁଥିବା ଡ୍ରାଇଭର, ହେଲପରମାନଙ୍କ ପାଇଁ ସରକାର ବୀମା ଘୋଷଣା କରିଛନ୍ତି। ଆରଟିଓ କର୍ମଚାରୀମାନେ ବର୍ତ୍ତମାନ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଥିବା ବେଳେ ରାଜ୍ୟ ସରକାର ବିଭିନ୍ନ ପରିବହନ କ୍ଷେତ୍ର ପାଇଁ ଡ୍ରାଇଭର ଓ ହେଲପରଙ୍କୁ କାର୍ଯ୍ୟରେ ନିୟୋଜିତ କରୁଛନ୍ତି। ଫଳରେ ସେମାନଙ୍କ ପାଇଁ ମଧ୍ୟ ସଂକ୍ରମଣର ଆଶଙ୍କା ରହିଛି। ଅନେକ ଗାଡ଼ି କୋଭିଡ-୧୯ ପାଇଁ ନିୟୋଜିତ ମଧ୍ୟ ହେଉଛି। ସେହିପରି ବିଭିନ୍ନ ରାଜ୍ୟରୁ ଆସୁଥିବା ଶ୍ରମିକମାନଙ୍କୁ ନେବା ଆଣିବା ପାଇଁ ସରକାର ଗାଡ଼ି ଯୋଗାଉଛନ୍ତି। ସୋମବାର ଏହି ବୀମା ସମ୍ପର୍କରେ ପରିବହନ କମିଶନର ସଞ୍ଜୀବ ପଣ୍ଡା ରାଜ୍ୟର ସମସ୍ତ ଆଞ୍ଚଳିକ ପରିବହନ ଅଧିକାରୀଙ୍କୁ ଚିଠି ମାଧ୍ୟମରେ ଅବଗତ କରିଛନ୍ତି।
