ଲକଡାଉନ ନିୟମର ପାଳନ କରିବାକୁ ମୁଖ୍ୟମନ୍ତ୍ରୀଙ୍କ ଚେତାବନୀ, ଉଲଂଘନ କଲେ ହେବ ଦୃଢ଼ କାର୍ଯ୍ୟାନୁଷ୍ଠାନ

ଭୁବନେଶ୍ବର,ଏନ୍ଏନ୍ଏସ୍: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, କରୋନାକୁ ନେଇ ଲୋକେ ଭୟ କରନ୍ତୁ ନାହିଁ। ବରଂ ସାମାଜିକ ଦୂରତା ଅବଲମ୍ବନ କରନ୍ତୁ। ରାଜଧାନୀ ବମିଖାଲ ଅଞ୍ଚଳରୁ ରବିବାର ରାତି ଏକକାଳୀନ ୧୫ ଜଣ କରୋନା ପଜିଟିଭ ଚିହ୍ନଟ ହେବା ପରେ ମୁଖ୍ୟମନ୍ତ୍ରୀ ଏହି ପରାମର୍ଶ ଦେଇଛନ୍ତି। ସେ କହିଛନ୍ତି, ଲୋକେ ଲକ୍‌ଡାଉନ୍ ନିୟମକୁ ପାଳନ କରନ୍ତୁ ଓ ସାମାଜିକ ଦୂରତା ରକ୍ଷା କରନ୍ତୁ। ଏଥି ସହିତ ନବୀନ ଚେତାବନୀ ଦେଇ କହିଛନ୍ତି, ସାମାଜିକ ଦୂରତା ଉଲଂଘନ ପ୍ରତି ‘ଶୂନ୍ୟ ସହିଷ୍ଣୁତା’ ନୀତି ଗ୍ରହଣ କରାଯିବ।

ରବିବାର ରାତି ଚିହ୍ନଟ ହୋଇଥିବା ୧୬ ଜଣ ପଜିଟିଭମାନଙ୍କ ମଧ୍ୟରୁ ୧୫ ଜଣ ହେଉଛନ୍ତି ବମିଖାଲ ଅଞ୍ଚଳର। କିନ୍ତୁ ଏହି ଅଞ୍ଚଳକୁ ପ୍ରତିବନ୍ଧିତ କରାଯାଇଛି। ବମିଖାଲ ସିଲ ହୋଇଥିବାରୁ ଭୟ କରିବାର କାରଣ ନାହିଁ ବୋଲି କହିବା ସହ ଲୋକେ ଲକ୍‌ଡାଉନ୍ ନିୟମ ପାଳନ କରି ଘର ଭିତରେ ରୁହନ୍ତୁ ବୋଲି ମୁଖ୍ୟମନ୍ତ୍ରୀ ନିବେଦନ କରିଛନ୍ତି। ସେ କହିଛନ୍ତି, ନିୟମ ଉଲଂଘନକାରୀଙ୍କ ବିରୋଧରେ ପୋଲିସ କଡ଼ା କାର୍ଯ୍ୟାନୁଷ୍ଠାନ ନେବ।