ଝାରସୁଗୁଡ଼ା,ଏନ୍ଏନ୍ଏସ୍: ଝାରସୁଗୁଡ଼ା ଜିଲ୍ଲା ଲଖନପୁର ବ୍ଲକ୍ ଠେବରା ଗ୍ରାମରେ ପରକୀୟା ପ୍ରୀତି ସନ୍ଦେହରେ ପରେଶ ଅଢାଙ୍କ ଟାଙ୍ଗିଆ ଚୋଟରେ ବିରେନ୍ଦ୍ର ମୁଣ୍ଡା ଗୁରୁତର ହୋଇଛନ୍ତି। ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟ ପଠା ଯାଇଥିବାବେଳେ ଅଭିଯୁକ୍ତ ପରେଶକୁ ପୁଲିସ ଅଟକ ରଖି ପଚରାଉଚୁରା କରୁଥିବା ଲଖନପୁର ଥାନା ଅଧିକାରୀ ପବିତ୍ର କିଶାନ ସୂଚନା ଦେଇଛନ୍ତି। ସୂଚନା ଅନୁଯାୟୀ, ବିରେନ୍ଦ୍ରଙ୍କ ପତ୍ନୀଙ୍କ ସହ ଅଭିଯୁକ୍ତ ପରେଶର ପ୍ରେମ ସମ୍ପର୍କ ଥିବା ସନ୍ଦେହ କରି ଗତ ୪ ତାରିଖରେ ଉଭୟଙ୍କ ମଧ୍ୟରେ କଳହ ହୋଇଥିଲା। ପରଦିନ ଭୋର ସମୟରେ ପରେଶ ବିରେନ୍ଦ୍ରଙ୍କ ଘରକୁ ଯାଇ ତାଙ୍କୁ ଟାଙ୍ଗିଆରେ ହାଣି ଫେରାର ହୋଇଯାଇଥିଲା। ପୁଲିସ ଅଭିଯୁକ୍ତକୁ ଅଟକ ରଖିବା ସହ ଟାଙ୍ଗିଆ ଜବତ କରି ମାମଲା ରୁଜୁ କରିଛି। ସୂଚନା ଯୋଗ୍ୟ, ଅଭିଯୁକ୍ତ ପରେଶ ବିରେନ୍ଦ୍ରଙ୍କ ବ୍ୟାଣ୍ଡପାର୍ଟିରେ କ୍ୟାସିଓ ମାଷ୍ଟର ଭାବରେ କାମ କରୁଥିଲା। ତେଣୁ ବିରେନ୍ଦ୍ର ଘରକୁ ସେ ସବୁବେଳେ ଯିବାଆସିବା କରୁଥିଲେ। ବିରେନ୍ଦ୍ର ମଧ୍ୟ ପରେଶକୁ ସମସ୍ତ ପରିସ୍ଥିତିରେ ସହଯୋଗର ହାତ ବଢାଉଥିଲେ ବୋଲି ଗ୍ରାମବାସୀ କହିଛନ୍ତି।
