ତେଜୁଛି ଜିଲ୍ଲାପାଳଙ୍କ ବିରୋଧୀ କଂଗ୍ରେସର ଆନ୍ଦୋଳନ, ଗିରଫ ଦାବି

ମାଲକାନଗିରି,ଏନ୍ଏନ୍ଏସ୍: ପୂର୍ବରୁ ମାଲକାନଗିରି ଜିଲ୍ଲାପାଳ ମନୀଷ ଅଗ୍ରୱାଲଙ୍କ ବିରୋଧରେ କଂଗ୍ରେସ ପକ୍ଷରୁ ସାମ୍ବାଦିକ ସମ୍ମିଳନୀରେ ଅଭିଯୋଗ ଅଣାଯାଇଥିବା ବେଳେ ସୋମବାର ପୁଣି ତାଙ୍କୁ ଗିରଫ କରିବା ପାଇଁ ଦାବି ହୋଇଛି। ଏ ନେଇ କଂଗ୍ରେସ ପକ୍ଷରୁ ଏକ ବିଶାଳ ରାଲି ଆୟୋଜନ କରାଯିବା ସହ ମାଲକାନଗିରି ଆଦର୍ଶ ଥାନକୁ ଘେରାଉ କରାଯାଇଛି। ଜିଲ୍ଲାପାଳଙ୍କ ପିଏ ଦେବ ନାରାୟଣ ପଣ୍ଡାଙ୍କ ଆତ୍ମହତ୍ୟା ପାଇଁ ନିଜେ ମନୀଷ ଅଗ୍ରୱାଲ ଦାୟୀ ବୋଲି ଅଭିଯୋଗ କରି ପୂର୍ବତନ ସାଂସଦ ତଥା ରାଜ୍ୟ କାର୍ୟ୍ୟକାରୀ ସଭାପତି ପ୍ରଦୀପ ମାଝୀ ଏତଲା ଦେଇଛନ୍ତି।

ଜିଲ୍ଲାପାଳଙ୍କ ଦୁର୍ନୀତି ବିଷୟରେ ପିଏ ଶ୍ରୀ ପଣ୍ଡା ଅବଗତ ଥିବା ସହ ସମସ୍ତ ତଥ୍ୟ ବାହାରେ ପ୍ରକଟ କରୁଥିବା ସନ୍ଦେହ କରି ଜିଲ୍ଲାପାଳ ତାଙ୍କୁ ମାନସିକ ଅତ୍ୟାଚାର କରୁଥିବା ଅଭିଯୋଗ କରାଯାଇଛି ।ଗତ ୨୬ ଓ ୨୭ ତାରିଖରେ ଜିଲ୍ଲାପାଳଙ୍କ ପିଏ ସ୍ୱର୍ଗତ ପଣ୍ଡାଙ୍କୁ ନାନା ପ୍ରକାରର ଧମକ ଦେଇ ବିନା କାରଣରେ ତାଙ୍କୁ ଚାକିରିରୁ ବହିସ୍କାର କରିବାକୁ କହି ମାନସିକ ଚାପ ଦେଉଥିବା କଂଗ୍ରେସ ପକ୍ଷରୁ ଅଭିଯୋଗ ହୋଇଛି।

ଏହି ଚାପକୁ ସହ୍ୟ କରିନପାରି ଗତ ୨୭ ତାରିଖରେ ସତୀଗୁଡା ଜଳ ଭଣ୍ଡାରରେ ଡେଇଁ ଆତ୍ମହତ୍ୟା କରିଥିଲେ । ତାଙ୍କ ମୃତ୍ୟୁ ପାଇଁ ଜିଲ୍ଲାପାଳ ସମ୍ପୂର୍ଣ୍ଣ ଦାୟୀ ଥିବାରୁ ଏହାର ତଦନ୍ତ କରି ତାଙ୍କୁ ତୁରନ୍ତ ଗିରଫ କରିବା ପାଇଁ ଦାବି ହୋଇଛି। ଏ ନେଇ ମାଲକାନଗିରି ଥାନା ଭାରପ୍ରାପ୍ତ ନିରୀକ୍ଷକ ରାମପ୍ରସାଦ ନାଗଙ୍କୁ ମଧ୍ୟ ଏତଲା ଦିଆଯାଇଛି। ଏଥିସହ ଥାନା ସାମ୍ମୁଖରେ ଜିଲ୍ଲାପାଳ ବିରୋଧୀ ସ୍ଲୋଗାନ ଦେଇ ଧାରଣାରେ ବସିଛନ୍ତି । ଏଥିରେ ସହ କର୍ମୀ ଅଂଶଗ୍ରହଣ କରିଛନ୍ତି ।