ପୁରୀ,ଏନ୍ଏନ୍ଏସ୍: ବଳଙ୍ଗା ଥାନା ଏଏସଆଇଙ୍କୁ ଆଜି କାର୍ଯ୍ୟରୁ ନିଲମ୍ବିତ କରାଯାଇଛି। ସୂଚନା ଅନୁସରେ ଜଣେ ବିବାହିତା ମହିଳାଙ୍କୁ ଦୁଷ୍କର୍ମ ଅଭିଯୋଗରେ ତାଙ୍କୁ ଶୁକ୍ରବାର ଦିନ ଗିରଫ କରାଯାଇଥିଲା। ଅଭିଯୋଗ ମୁତାବକ ୨୦୧୯ ଏପ୍ରିଲ ମାସରେ ଜନୈକ ବିବାହିତା ମହିଳା ତାଙ୍କ ସ୍ୱାମୀଙ୍କୁ ଥାନାରୁ ମୁକୁଳାଇବାକୁ ଯାଇଥିଲେ କିନ୍ତୁ ଏଏସଆଇ ଚିତ୍ତରଞ୍ଜନ ଦଫା କୋହଳ କରିଦେବା ପ୍ରତିଶୃତି ଦେଇ ନିଜ ବାସଭବନରେ ସମ୍ପୃକ୍ତ ମହିଳାଙ୍କ ସହ ଦୁଷ୍କର୍ମ କରିଥିଲେ। ଇତି ମଧ୍ୟରେ ଚିତ୍ତରଞ୍ଜନଙ୍କ ବିରୋଧରେ ବଳଙ୍ଗା ଥାନାରେ କେସ ନମ୍ବର ୨/୨୦୨୦ରେ ମାମଲା ରୁଜ୍ଜୁ ହେବା ସହ ତାଙ୍କୁ ଚାକିରିରୁ ନିଲମ୍ବନ କରାଯାଇଛି ଓ ଗିରଫ କରାଯାଇ ଜେଲ ପଠାଇ ଦିଆଯାଇଛି।
ତେବେ ଏ ସମ୍ପର୍କରେ ଚିତ୍ତରଞ୍ଜନ ଦାଶଙ୍କୁ ପଚାରିବାଳେ ମୁଁ ନିର୍ଦ୍ଦୋଷ, ଏଭଳି କୌଣସି ଦୁଷ୍କର୍ମ କରିନାହିଁ, ବଳଙ୍ଗା ପୁଲିସ ଷ୍ଟେସନର ଜଣେ ଅଧିକାରୀ ଓ ଦଲାଲ ମୋତେ ଫସାଇବା ପାଇଁ ଚକ୍ରାନ୍ତ କରିଛନ୍ତି ବୋଲି ବୟାନ ଦେଇଛନ୍ତି। ସେପଟେ ଏହି ଘଟଣାରେ ଆସିଛି ନୂଆ ମୋଡ । କାରଣ ବୟାନ ବଦଳାଇଛନ୍ତି ଦୁଷ୍କର୍ମ ପୀଡିତା । ପୀଡିତାଙ୍କ ୧୬୧ ବୟାନ ରେକର୍ଡ ବେଳେ ତାଙ୍କ ସହ ଦୁଷ୍କର୍ମ ହୋଇନଥିବା କହିଛନ୍ତି ବୋଲି ସୂଚନା ଦେଇଛନ୍ତି ପୁରୀ ଏସପି ଉମାଶଙ୍କର ଦାଶ ।
ଏଥିସହ ଦୁଷ୍କର୍ମ ଶିକାର ମହିଳାଙ୍କ ସ୍ୱାମୀଙ୍କୁ କେଉଁ ଘଟଣାରେ ଗିରଫ କରାଯାଇଥିଲା ଓ କେଉଁ ଦଫା ଲଗାଯାଇଛି ସେ ସମ୍ପର୍କରେ ପୁଲିସ ନୀରବ ରହିଛି। ସେହିପରି ଘଟଣା ଘଟିବାର ୯ମାସ ବିତି ଯାଇଥିଲେ ମଧ୍ୟ ସମ୍ପୃକ୍ତ ମହିଳା ଜଣକ କାହିଁକି ଅଭିଯୋଗ କରି ନ ଥିଲେ ତାହା ଏବେ ମଧ୍ୟ ପ୍ରଶ୍ନବାଚୀ ହୋଇ ରହିଛି। ତେବେ ଗିରଫ ଚିତ୍ତରଞ୍ଜନଙ୍କ ବୟାନ ଯଦି ସତ ହୁଏ ତା ହେଲେ ରାଜ୍ୟରେ ଥାନାଗୁଡିକରେ ସରକାରଙ୍କ ‘୫ଟି’ ଏବେ ମଧ୍ୟ ଅପହଞ୍ଚ ରହିଛି ଓ ଦଲାଲମାନେ ପୂର୍ବ ଭଳି ସକ୍ରିୟ ରହିଥିବା ପ୍ରମାଣିତ ହେଉଛି।
