ଦାରିଙ୍ଗବାଡ଼ି,ଏନ୍ଏନ୍ଏସ୍: କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକ୍ ବ୍ରାହ୍ମଣୀଗାଁ ଥାନା ବଙ୍ଗଡ଼ଦୁଆ ଘାଟି ନିକଟରେ ମଙ୍ଗଳବାର ସକାଳରେ ଏକ ବୋଲେରୋ ବାଲିଗୁଡା ଅଭିମୁଖେ ଯାଉଥିବା ବେଳେ ଆରପଟୁ ଆସୁଥିବା ଅଟୋ ସହ ମୁହାଁମୁହିଁ ଧକ୍କା ହୋଇଥିଲା। ଫଳରେ ଏଥିରେ ୧୦ଜଣ ଗୁରୁତର ଆହତ ହୋଇଛନ୍ତି। ଆହତମାନେ ହେଲେ ଶୈଳେନ୍ଦ୍ର ମାଝୀ, ଅନନ୍ତ ମାଝୀ, ରେଣୁ ପ୍ରଧାନ, ମାଧୁରୀ ବଳିଆର ସିଂ, ନମିତା ପ୍ରଧାନ, ଉନ୍ନତି ମାଝୀ, ଆହରଣ ମାଝୀ, ସୁଭମ କୁମାର ପ୍ରଧାନ ଆନ୍ଦ୍ରିୟମାଝୀ, ଆଇବ ମାଝୀ।
ଘଟଣା ସ୍ଥଳରେ ବ୍ରାହ୍ମଣୀଗାଁ ପୁଲିସ ପହଞ୍ଚି ଆହତମାନଙ୍କୁ ସ୍ଥାନୀୟ ପ୍ରାଥମିକ ଚିକିତ୍ସାଳୟରେ ଭର୍ତି କରିଛି। ସେହିପରି ୫ଜଣଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବା ଜଣାଯାଇଛି। ସେମାନଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସୂଚନା ଅନୁସାରେ ତାଜୁଙ୍ଗିଆ ଅଞ୍ଚଳର କିଛି ଲୋକ ଏକ ଯାତ୍ରବାହୀ ଅଟୋ ନଂ(ଓଡି-୦୭ଏନ୍-୨୦୮୪)ରେ ଝିଞ୍ଜିରିଗୁଡ଼ା ପଞ୍ଚାୟତ ଗଡ଼ମା ଗ୍ରାମକୁ ଯାଉଥିବା ବେଳେ ବ୍ରାହ୍ମଣୀଗାଁ ନିକଟ ବଙ୍ଗଡ଼ଦୁଆ ଘାଟିରେ ବ୍ରାହ୍ମଣୀଗାଁ ଠାରୁ ଏକ ଏକ ବୋଲେରୋ ନଂ(ଓଡି-୦୨ଏଟି-୫୫୯୪) ବାଲିଗୁଡା ଯାଉଥିବା ସମୟରେ ବଙ୍ଗଡ଼ଦୁଆ ଘାଟିରେ ମୁହାଁମୁହିଁ ହୋଇଥିଲା। ଏ ନେଇ ବ୍ରାହ୍ମଣୀଗାଁ ଥାନାରେ କେସ୍ ନଂ-୧୦୩/୧୯ରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିବା ଥାନା ଅଧିକାରୀ ରଞ୍ଜିତ କୁମାର ମୁନି ପ୍ରକାଶ କରିଛନ୍ତି।
